तू
तू स्वप्नांच्या स्वप्नी
तू गीत स्वरांच्या ओठी
रेघ तुझ्या सौंदर्याची
आहे नजरेहून मोठी
तू
तू मौनांचा सांगावा
तू खिन्नतेचा सल
तुझ्या रूपेरी डोळ्यात
तेज तमाचे तरल
तू
तू आस आसवांची
तू आभासांचा भास
सावलीस हवाहावासा
तुझा धुंद सहवास
तू
तू ध्यास अशाश्वताचा
तू श्वासांचा जीव
नसानसांत भिणली माझ्या
तुझी तप्त जाणीव
पावसात ती
तिच्यात पाउस
दोन्हीत मी
चिम्ब भिजलेला ।
मनात ती
तिच्यात मन
दोन्हीत मी
पूर्ण हरवलेला ।
आयुष्यात ती
तिच्यात आयुष्य
दोन्हीत मी
सदा रमलेला ।
सार्यात ती
तिच्यात सारे
दोन्हीत मी
अंतर्बाह्य रंगलेला .
नमस्कार मित्रांनो नमस्कार
आज पासून मी हा नविन ब्लॉग सुरु करतोय जो फ़क्त माझ्या कवितांचा असणार आहे।
ही माझी गरज आहे जगण्याची , स्वताचा शोध घेण्याची, आणि यात जे अनुभव येतील ते तुमच्याशी
वाटुन घेण्याची .
